«Таза Қазақстан» республикалық қозғалысы аясында «Таза мұз» экологиялық акциясы кеше Щучье-Бурабай курорттық аймағының көлдерінде өтті. «Бурабай» МҰТП 5 орманшылығының инспекторлық құрамы мен әуесқой балықшылар бірлесіп, су айдындарының мұз бетінен жалпы салмағы 850 кг болатын 32 қап қоқыс жинады.
Бейресми сенбілік аясында Бурабай, Кіші Шабақты, Щучье, Катаркөл және Жүкей көлдері тазартылды.
«Бұл акция біздің ұлттық парктің көлдерінің бірегей экожүйелерін таза ұстауға және қорғауға бағытталған. Мұз еріген кезде бұл қоқыс көлдердің түбіне түседі. Аталған іс-шара көл беттерінен қоқыстарды тазарту бойынша қыс мезгілінде жүргізіліп отырған алғашқы әрекеттердің бірі емес. Балықшылардың арасында қоқыс тастап жүргендермен қатар, ұлттық парктің тазалығы мен табиғи байлығын сақтауға өз үлесін қосып жүргендердің бар екенін көру өте қуанышты», – деп атап өтті МҰТП инженер-ихтиологы Нұрман Айтқожин.
Тазалау жұмыстары барысында мамандар көлдердің мұз қабатының жағдайын бағалап, кездейсоқ оқиғалардың алдын алу мақсатында балықшылардың үйлерін демонтаждап, шығарды.
Сонымен қатар, акция барысында инспекторлар мұздың еру мезгіліндегі көлде өзін-өзі ұстау ережелері мен қауіпсіздік техникасын сақтау жөнінде ұсыныстары жазылған жарнама парақтарын таратты.
Инженер-ихтиолог Нұрман Айтқожин бұндай акциялардың азаматтарды волонтерлік жұмысқа тартуға және табиғаттағы қауіпсіз демалыс мәдениетін қалыптастыруға ықпал ететінін ерекше атап көрсетті.
