Бурабайдағы қыс Бурабай – табиғаттың қар жамылғысына оранып, тылсым тыныштыққа бөленетін ерекше мезгіл. Алайда бұл көркем маусым ұлттық парктің жануарлары үшін сынақ кезеңі де бола алады. Жабайы аңдар табиғи қоректену көздеріне қолжетімділік шектеулі жағдайда азық іздеуге мәжбүр. Сол себепті «Бурабай» мемлекеттік ұлттық табиғи паркінде жыл сайын жануарларға арналған азықты дайындау бойынша жүйелі жұмыс жүргізіледі.
Қыс мезгілінде тұяқты жануарлар мен ұлттық парктің басқа да тіршілік иелерінің популяциясын сақтау үшін жем-шөп қорын қалыптастыру қажет. Дайындалған шөп, бұтақтық азық, тамыржемістер мен дәнді дақылдар бұғы, елік, қабан және басқа да жануарлар үшін маңызды қорек көзіне айналады. Бұл жануарларға ең суық айларда күш-қуатын сақтап, қысты елеулі шығынсыз өткеруге көмектеседі.
Қысқы кезеңде жануарларды қолдау – биоалуантүрлілікті сақтаумен тікелей байланысты. «Бурабай» мемлекеттік ұлттық табиғи паркінде 48 сүтқоректі түрі, 221 құс түрі және Қазақстанның Қызыл кітабына енген сирек кездесетін фауна өкілдері мекендейді.
Соңғы санақ нәтижесі бойынша парк аумағында 1472 аскания бұғысы, 1429 сібір елігі, 696 қабан, 141 бұлан, сондай-ақ сирек жыртқыштар – 55 сілеусін мен 38 қасқыр мекендейді. Жалпы алғанда, оннан астам сүтқоректі түрі тіркелген, олардың қатарында ақ қоян (1025 дара), түлкі (368), тиін (341), сондай-ақ күзен тұқымдастар – ақкіс, ласка, дала күзен мен корсак бар. Оларға қамқорлық жасау – табиғатты қорғаудың жалпы жүйесінің маңызды бөлігі.
Ұлттық парктің қызметкерлері қысқы кезеңде жабайы жануарларды қолдауға бағытталған биотехникалық іс-шараларды жүйелі түрде жүзеге асырады. Жаз және күз мезгілдерінде шөп, бұтақтық азық, көкөністер дайындалады. Қыс кезінде арнайы астаулар мен қосымша қоректендіру алаңдарына тұрақты түрде жеткізіліп отырады.
2025 жылы 450 тоннадан астам шөп, шамамен 19 тонна тұз, 108 тонна ағаш жапырағы, 250 тоннадан астам дәнді дақылдардан жасалған жем дайындалды.
Көктемнен бастап қызметкерлер дәстүр бойынша сыпырғыштар дайындайды. Биыл 137 мың дана жиналды. Бұтақты жем әсіресе қарлы қыс мезгілінде маңызды, өйткені табиғи қоректену көздері еліктерге, бұғыларға және парктің басқа да жануарларына қолжетімсіз болып қалады.
Сыпырғыштарды дайындау процесі көктемде басталып, кеш күзге дейін жалғасады. МҰТП қызметкерлері қоректік заттарға бай және жануарлар жақсы жейтін жапырақты ағаштардың бұтақтарын жинайды. Дайындалған сыпырғыштар кептіріліп, арнайы жабдықталған орындарда сақталады. Аяз түскен кезде олар жануарлар көп шоғырланатын жерлерге ілініп, қатал қыс айларында қосымша қорекпен қамтамасыз етеді.
Бұдан басқа, 26 жаңа оттық дайындалды, сондай-ақ 50 оттық жөнделді, жаңа тұздықтар жабдықталды, сондай-ақ қоректендіру алаңдарын жөндеу және қабандарға арналған паналар орнату көзделген.
Табиғатта тұз көздері жеткіліксіз болғандықтан, жануарлар қажетті минералдарды алу үшін арнайы жасалған тұздықтарға тартылады. Тұз тұяқты жануарларға (мысалы, бұлан мен елікке) денсаулықты сақтау, еркектерде мүйіздің дамуы және ұрғашыларда ұрпақты көтеру үшін аса қажет.
«Бурабай» МҰТП-да азық дайындау – өңірдің экожүйесінің тұрақтылығын сақтауға және биологиялық әртүрлілікті қорғауға бағытталған маңызды шара. Ұлттық парктің қызметкерлері жүйелі жұмыс арқылы жануарлардың қатал қыстан аман өтуіне көмектесіп, «Қазақстанның інжу-маржаны» саналатын табиғи байлықты сақтауға өз үлесін қосуда.
Жем-шөп дайындау және басқа да биотехникалық іс-шаралар жануарлар популяциясының тұрақтылығын сақтауға, олардың ауыр қыс мезгілін еңсеруіне жәрдемдесуге мүмкіндік береді, бұл өз кезегінде Бурабай экожүйесінің табиғи тепе-теңдігін сақтауға ықпал етеді.
