Орманға, табиғатқа деген сүйіспеншілік Болатбек Шүтеновта бала кезінен қалыптасты. Ол таза ауада серуендегенді, тыныштықты тыңдағанды, қылқан жапырақты орманның хош иісін сезінгенді ұнататын. Табиғатқа деген осы махаббат оның өмір жолын айқындап берді. Мектептен кейін Щучинскідегі әскери мектепке түсіп, кейін орманды қорғау мен өртке қарсы күреспен тікелей байланысты мамандықты таңдады.
— Біздің миссиямыз қарапайым да, сонымен бірге өте жауапты: өрттің алдын алу, ал егер ол тұтанса, оны толық сөндіргенге дейін күресу, — дейді «Бурабай» МҰТП ЛПС-2 (Орман өртке қарсы станциясы) бөлімшесінің жауынгері Болатбек Шүтенов.
Орман өртке қарсы станциясының жауынгерінің жұмыс күні — бұл үнемі кезекшілік атқару. Кез келген сәтте ол және оның әріптестері өрт шыққан жерге аттануға дайын болуы тиіс. Кейде отқа апаратын жол ойлы-қырлы жерде өтеді: әуелі көлікпен, одан кейін толық жабдықпен, 20 литрлік су салынған дорбамен жаяу көтерілуге тура келеді.
— Бұл оңай емес, әсіресе өрт тауда немесе түнде, қатты жел соғып тұрған кезде шықса, — дейді ол. — Бірақ бұл біздің парызымыз.
Мұндай жұмыс үшін мықты физикалық дайындық қажет. Сондықтан ЛПС-2 жауынгерлері тұрақты түрде жаттығады — станция базасында немесе арнайы полигондарда. Олардың қару-жарағында заманауи техника бар, парк жыл сайын жаңартылып отырады. Соңғы жылдары Smart өртті ерте анықтау жүйесі кеңінен қолданылып жүр. Оның көмегімен өртті анықтаудан бастап оқиға орнына жеткенге дейінгі уақытты едәуір қысқартуға болады. Бұл өртті жедел оқшаулауға және оның таралуына жол бермеуге мүмкіндік береді.
— Табиғатта өрт көбіне найзағайдың ағашқа түсуінен шығады. Бірақ біз отты тоқтата алсақ, бойымызды қанағат сезімі билейді: еңбегіміз ақталды, орманды сақтап қалдық, — дейді Болатбек.
ЛПС-тегі жұмыс ұйымшылдықты талап етеді. Мұнда өзара көмек пен әріптеске сенім — өмірлік маңызы бар шарт.
— Біздің ұжымда бауырмалдық орнаған. Әрине, бізді біріктіріп тұрған да — отқа қарсы ортақ күрес, — дейді ол күлімсіреп.
Болатбектің берік отбасы бар: жары және екі баласы өсіп келеді. Үлкен ұлы, сегізінші сынып оқушысы, әкесінің жолын қуып, ҚР ТЖМ академиясына түсіп, өрт сөндіруші болуды армандайды.
— Біз өз жұмысымызды сүйеміз! — деп мақтанышпен айтады Болатбек. — Ең бастысы, туристер де өз жауапкершілігін түсінуі керек: темекі тұқылын, әйнек пен қоқысты тастамасын. Өйткені Бурабайды сақтау — барлығымыздың ортақ міндетіміз.
Болатбек Шүтенов сияқты адамдардың тарихы көрсетіп отыр: ұлттық парктің әсемдігі мен сұлулығының артында өз ісіне берілген, рухы мықты жандар тұр. Орманды қорғау олар үшін жай ғана мамандық емес, шынайы өмірлік миссия.
