Күзгі Бурабай орманы өзгеше үн қатады – тыныштықта орман түкпірінен естілгендей созылмалы дауыс естіледі. Бұл – аңыз да емес, таулардың жаңғырығы да емес. Бұл – бұғы гоны, жылдағы ең толқулы әрі әсерлі кезең. Дәл осы уақытта келушілер «орманның даусын» – өз ұрпағын жалғастыру құқығы үшін күресіп, өзін танытатын аталық бұғының даусын естуі мүмкін.
Гон шамамен қыркүйектен қараша айына дейін созылады. Осы кезде аталық бұғылар қатты үн шығарып, аналық үшін таласады және үстемдігін көрсетеді. Олар жаңа аумаққа көшіп, белсенділігі артады. Бұл олардың адаммен кездесу қаупін жоғарылатады. Сол себепті келушілерге аса сақ болу маңызды: жануарларға жақындамау, жем бермеу, шуламау және түсірілім кезінде зум қолдану қажет.
Автокөлік жүргізушілеріне арналған кеңестер де бар! Ұлттық парк аумағына жақын өтетін жолдарда жылдамдықты төмендету керек. Кешкі уақытта және түнде – жануарлар жиі қозғалған кезде – барынша мұқият болу қажет. Жабайы табиғат туралы ескертетін жол белгілеріне назар аударып, жол жиегін бақылап отыру – жол-көлік оқиғаларын болдырмауға көмектеседі.
Гон – бұғылардың өмірлік циклінің табиғи бөлігі. Популяцияны сақтап қалу үшін ол аса қажет. ГНПП «Бурабай» деректеріне сәйкес, паркте шамамен 1 500 асканийлік бұғы мекендейді. Гон осы популяцияның генетикалық алуан түрлілігін қамтамасыз етеді.
Бұл нәзік кезеңде адам тарапынан болатын кез келген араласу жануарларға күйзеліс тудырып, олардың табиғи мінез-құлқын бұзуы немесе көбейуіне кедергі келтіруі мүмкін. Сондықтан жануарларды үркітуге болмайды.
Гон маусымы – тек табиғи құбылыс қана емес, парктің әрбір қонағы үшін жауапкершілік кезеңі. Ережелерді сақтау және сақтық таныту – Бурабайдың жабайы табиғаты мен адамдар арасындағы үйлесімділікті сақтаудың маңызды кепілі.
