2025 жылы «Бурабай» мемлекеттік ұлттық табиғи паркінің аумағында бірегей жоба іске қосылды — EcoPlaton цифрлық платформасы негізінде құрылған геймификацияланған «Бөлектау» экотропасы. Бұл — Қазақстандағы алғашқы интерактивті экотропа. Мұнда келушілер маршрутты қызықты квест форматында өтеді: Telegram-бот пен аудиогидтер арқылы табиғат туралы танымдық деректермен танысады.
Қоршаған ортаға ұқыпты қарауды ойын форматында үйрететін EcoPlaton эко-ботын Қарағанды қаласының жас оқушысы Платон Нечаев әзірлеген.
Орталық Азияның тұрақты даму жөніндегі «Creative & Innovation Institute» қоғамдық қоры (жетекшісі Ирина Харитонова) жүзеге асырған пилоттық жоба жоғары нәтижелер көрсетті:
• келушілердің қатысу белсенділігі айтарлықтай артты;
• туристер Бурабайдың флорасы, фаунасы мен аңыздары туралы көбірек ақпарат алды;
• экологиялық мәдениет пен саналы мінез-құлық деңгейі көтерілді.
Жуырда бейнеконференция форматында Қарағанды облысында осындай цифрлық шешімдерді енгізу мәселесі талқыланды. Қатысушылар Бурабай тәжірибесіне жоғары баға беріп, EcoPlaton жобасын жергілікті туристік маршруттарда пилоттық негізде енгізу мүмкіндігін қарастыруды ұсынды.
