Жазғы маусым «Бурабай» МҰТП үшін жылдың басты сынағына айналды. Аптап ыстық пен өрт қаупінің жоғары деңгейі туристер ағыны ең көп болатын кезеңмен тұспа-тұс келді. 130 мың гектарға жуық аумақта бір мезгілде өрт жағдайын бақылау, туристер ең көп шоғырланатын аймақтарды қадағалау, құқық бұзушылықтардың жолын кесу және табиғи кешендерді күнделікті қорғауды қамтамасыз ету қажет болды. Үш ай ішінде ұлттық парк аумағында 12 өрт оқиғасы тіркеліп, олардың барлығы бастапқы кезеңде анықталып, сөндірілді. Бурабайда ірі орман өрттеріне жол берілген жоқ.
Бұл жұмыстың негізінде өртті ерте анықтау жүйесі жатыр. Парк аумағы қызметкерлердің тұрақты бақылауында, ал Smart жүйесі ықтимал өрт ошақтарын қашықтан анықтап, ақпаратты жедел жеткізуге көмектеседі. Одан әрі тікелей қорғалатын аумақта жүрген инспекторлар әрекет етеді. Осы мақсатта ұлттық паркте 27 кордон жұмыс істейді. Өрт қаупі жоғары кезеңде жұмысты осылай ұйымдастыру өрт ошағы анықталған сәттен бастап қызметкерлердің оқиға орнына жетуіне дейінгі уақытты қысқартуға мүмкіндік береді.
Алайда жаз мезгіліндегі қауіп-қатер тек ауа райымен байланысты емес. Демалушылар саны артқан сайын ормандарға, көлдерге және танымал туристік маршруттарға түсетін жүктеме де көбейеді. Сондықтан өртке қарсы бақылаумен қатар келушілермен жүргізілетін жұмыс та күшейтілді.
Жаз бойы 20-дан астам ведомствоаралық рейд өткізілді. Демалыс және мереке күндері рейдтер жиілетілді. Мемлекеттік инспекторлармен бірге полиция, прокуратура, санитариялық-эпидемиологиялық бақылау және басқа да мемлекеттік органдардың қызметкерлері қатысты. Негізгі құқық бұзушылықтар қатарында автокөліктердің орман алқаптары мен көл жағалауларына заңсыз кіруі, шатырларды арнайы бөлінбеген орындарға тігу, аумақты ластау және өрт қауіпсіздігі талаптарын бұзу болды. Ал орман ішінде кәуап дайындау үшін от жаққан демалушыларға 100 АЕК немесе 432 500 теңге мөлшерінде айыппұл салынды.
Рейдтер барысында профилактикалық жұмыстар да жүргізілді. Инспекторлар келушілерге автокөлікті қай жерде қалдыруға және шатырды қай жерде тігуге болатынын, өрт қаупі жоғары кезеңде қандай шектеулер қолданылатынын, сондай-ақ басқа жерлерде қалыпты саналатын кейбір демалыс түрлеріне ерекше қорғалатын табиғи аумақта неліктен жол берілмейтінін түсіндірді. Бұл жұмыс әлеуметтік желілер мен парктің ресми ақпараттық ресурстарында да жалғасты.
Биыл бақылауды күшейту жұмыстары цифрлық деңгейде де жүргізілді. Туристер ең көп баратын жеті табиғи нысанда 14 бейнебақылау камерасы орнатылды. Олар Бөлектау, «Махаббат алаңы», Аютас, Кебістас, Максимка, «Мойнақ жартасы» және «Иманай бұлағы» бақылау алаңдарын қамтиды. Бейнежазба «Бурабай» МҰТП Жедел басқару орталығына келіп түседі. Мамандар танымал маршруттардағы жағдайды қашықтан бақылап, ықтимал қауіпті жағдайларға жедел әрекет ете алады және келушілер саны туралы объективті деректер алады. Бұл қай табиғи нысандарға жүктеме көбірек түсетінін және олардың қайсысына ерекше назар аудару қажеттігін анықтауға мүмкіндік береді.
Бұл жүктеменің ауқымын тағы бір көрсеткіштен байқауға болады. Үш жаз айында ұлттық парк аумағынан шамамен 514 тонна қалдық шығарылды. Бұл шамамен 20 миллион бос пластик бөтелкенің салмағына тең. Сондықтан аумақты тазалау жұмыстары келушілерге қоқысты өздерімен бірге алып кету қажеттігін үнемі еске салумен қатар жүргізілді. Жүздеген мың адам келетін жағдайда бір турист қалдырған бір бөтелке немесе пакет те түптеп келгенде ондаған, тіпті жүздеген тонна қалдыққа айналады.
Сонымен қатар ұлттық парк атқаратын жұмыстың басым бөлігі туристердің көзіне көріне бермейді. Инспекторлар маршруттарды патрульдеп, өртке қарсы қызметтер жағдайды бақылауда ұстаған кезде мамандар табиғи кешендерге ғылыми бақылау жүргізуді және биотехникалық іс-шараларды жалғастырды. Бурабайды қорғау жұмысы туристік соқпақтар аяқталған жерде тоқтамайды.
Жазғы маусым аяқталғанымен, Бурабайдағы табиғатты қорғау жұмыстары жыл бойы жалғасады. Жоғары туристік маусым аяқталған соң рекреациялық жүктеме төмендейді, алайда жазғы міндеттердің орнын ормандарды қорғау, табиғи кешендердің жай-күйіне мониторинг жүргізу және паркті келесі кезеңге дайындау жөніндегі маусымдық жұмыстар басады.
