«Бурабай» МҰТП-де қолданыстағы 10 туристік маршрутты абаттандыру бойынша кешенді жұмыстар аяқталды. Бірнеше ай бойы танымал бағыттарда бақылау алаңдарына апаратын жолдар ретке келтіріліп, ағаш төсемдер мен баспалдақтар, бағыттаушы белгілер, орындықтар мен қоқыс жәшіктері орнатылды. Жұмыстар келушілердің жайлылығы мен қауіпсіздігін арттыруға, сондай-ақ табиғи аумақтарды өсіп келе жатқан туристік жүктемеден қорғауға бағытталды.
Абаттандыру жұмыстары Щучье-Бурабай курорттық аймағын дамытудың 2025–2029 жылдарға арналған кешенді жоспарын іске асыру аясында жүргізілді. Жұмыстар Бөлектау, Махаббат алаңы, Максимка бақылау алаңдарына және Кенесары үңгіріне апаратын маршруттарды қоса алғанда, бірқатар бағытты қамтыды.
«Біздің басты міндетіміз – инфрақұрылымды жай ғана толықтыру емес, туристер қозғалысын дұрыс ұйымдастыру. Бұл әсіресе келушілер санының көптігі табиғи аумаққа айтарлықтай жүктеме түсіріп отырған жерлер үшін маңызды», – дейді «Бурабай» МҰТП директорының орынбасары Венера Нұғманова.
Бақылау алаңдарына апаратын жолдар мен маршруттардың күрделі учаскелеріне ерекше назар аударылды. Мәселен, Бөлектау тауының етегінде ағаш баспалдақ пен төсемдер орнатылды. Олар келушілерді арнайы дайындалған жолмен бағыттап, көптеген бейберекет соқпақтардың пайда болуына жол бермеуге мүмкіндік береді.
«Бұл топырақ пен өсімдік жамылғысын сақтау үшін өте маңызды. Жүздеген келуші бір нүктеге жету үшін әрқайсысы өз жолын таңдаған кезде айналадағы аумақ біртіндеп тапталып, ал беткейлерде топырақтың бүлінуі күшейе түседі. Арнайы жабдықталған маршрут адамдар қозғалысын белгілі бір учаскеге шоғырландырып, сол арқылы табиғатқа әсер ететін аумақты азайтады», – деп түсіндіреді ұлттық парк мамандары.
Сонымен қатар маршруттарда келушілерге бағдар алуға және белгіленген жолдан шықпауға көмектесетін бағыттаушы белгілер орнатылды. Демалуға арналған орындықтар қойылып, тазалықты сақтау үшін қоқыс жәшіктері орналастырылды.
Осылайша жүргізілген абаттандыру жұмыстары бірден бірнеше міндетті шешеді: маршруттарды туристер үшін түсінікті, қолайлы әрі қауіпсіз етеді, келушілер ағынын реттейді және сонымен бірге ең көп баратын табиғи аумақтарға түсетін жүктемені азайтады.
«Бурабай» МҰТП-де туристік инфрақұрылымды дамыту жұмыстары дәл осы қағидатқа негізделген: ұлттық паркке келушілер санының өсуі адамдарға табиғи көрікті жерлерді тамашалауға мүмкіндік беретін, сонымен қатар оларға түсетін әсерді арттырмайтын жағдай жасаумен қатар жүруі тиіс.
Осы тұрғыдан алғанда, жабдықталған маршруттар туристерге қолайлы жағдай жасаудың ғана емес, табиғатты қорғаудың да маңызды құралына айналады.
