«Бурабай» мемлекеттік ұлттық табиғи паркінің аумағында заңсыз балық аулау дерегі анықталды. Құқық бұзушылық Жүкей көліндегі Жедел басқару орталығының бейнебақылау жүйесі арқылы тіркелді.
Аумақты тұрақты бақылау және ұлттық парк қызметкерлерінің жедел әрекет етуі нәтижесінде құқық бұзушылық туралы ақпарат құқық қорғау органдарына дер кезінде жеткізілді.
Полиция мәліметінше, заңсыз балық аулауға Астана және Қосшы қалаларынан келген ер адамдардың қатысы бар. Олар балық аулау үшін қайықтар мен балық аулау торларын пайдаланған. Заңсыз ауланған балықтың жалпы салмағы 33 келіні құрады.
Аталған дерек бойынша Қазақстан Республикасы Қылмыстық кодексінің 335-бабының 3-бөлігімен қылмыстық іс қозғалды. Бұл бап мүлкін тәркілей отырып, алты жылға дейінгі мерзімге бас бостандығынан айыру жазасын қоса алғанда, қылмыстық жауапкершілікті көздейді. Қазіргі уақытта тергеу амалдары жүргізілуде.
«Бурабай» МҰТП мамандары заманауи бейнебақылау жүйелерінің табиғи аумақтарды қорғауда маңызды рөл атқаратынын атап өтеді. Олар ұлттық парктің шалғай учаскелерін бақылауға, құқық бұзушылықтарды дер кезінде анықтауға және құқық қорғау органдарымен жедел өзара іс-қимылды қамтамасыз етуге мүмкіндік береді.
Ұлттық парк әуесқойлық (спорттық) балық аулауға рұқсат етілген су айдындарында балық аулау тиісті жолдаманың негізінде және белгіленген қағидаларды сақтай отырып жүзеге асырылатынын еске салады. Жолдаманы «Бурабай» МҰТП-нің ресми сайтында рәсімдеуге болады. Алайда жолдаманың болуы тыйым салынған аулау құралдарын пайдалануға немесе балық аулауға тыйым салынған учаскелерде балық аулауға құқық бермейді.
«Бурабай» МҰТП өңір тұрғындары мен қонақтарын табиғат қорғау заңнамасын сақтауға және Қазақстанның табиғи байлықтарына ұқыпты қарауға шақырады.
